LAOAG CITY – Inbatad ni Abdullah Al-Rajhi, pannakangiwat ti Public Authority for Civil Aviation, a tinarget ti sumagmamano a drone attack ti Kuwait International Airport.
Nupay kasta, inbatad na nga awan dagiti naireport a natay iti insidente ken limitado laeng ti pisikal nga intunda na iti erupuerto ngem nagresulta ti dakkel a perdisyon iti radar system ti airport.
Innayon ni Al-Rajhi a dagus a nagresponde dagiti emergency team ken dagiti dadduma a maseknan nga ahensya tapno kitaen ti sitwasyon ken siguradwen ti kinatalged ti operasyon, kasta pay ti pannakaisubli ti normal nga operasyon iti kabiitan a panawen.
Inpasigurado na pay ti naan-anay a commitment dagiti otoridad, katulungan da dagiti dadduma pay nga ahensya, a mangisayangkat da kadagiti kasapulan nga addang tapno mapagtalinaaed ti seguridad ken kinatalged ti civil aviation iti Kuwait.
