LAOAG CITY – Inlawlawag ni Vice Mayor Vicentito “Toto” Lazo ditoy ciudad ti Laoag no siasinno dagiti rebbeng na a maikkan ti tulong pinansyal kabayatan ti pannakaipatungpal ti Enhanced Community Quarantine (ECQ) iti intero a Luzon gapu iti covid-19.
Inbatad na a no ti maysa nga household ket addaan laeng ti dua a miembro ket maikkan ti 500 a pisos ngem no ad-ado ngem tallo ti miembro na ket sangaribo a pisos ti maawat na.
Kuna na a ti laeng maikkan ket dagiti household nga awan pulos ti makapagtrabaho a miembro na, kayat na a sawen nga uray naawanan ti pagtrabahoan dagiti agasawa gapu iti covid-19 no adda ti trabaho nga uray maysa laeng nga anak da ket saanda a kwalipkado a maikkan ti tulong.
Innayon na nga uray dagiti adda ti kabbalay na nga agpenpension, bassit man wenno dakkel ti maaw-awat na ket saan da a maikkan ti tulong.
Nupay kasta, kuna ni Lazo a dagitoy ti maikadwa a prayoridad da ken no addan to mabati kalpasan a maikkan amin dagiti awan pulos ti pamastrekan na ket mabunongan danto met.
Kabayatanna, inbatad pay ni Lazo nga uray dagiti agaw-awat ti foreign aid ket saan a maikkan ti tulong pinansyal manipod iti gobierno ditoy ciudad ti Laoag.
