LAOAG CITY – Pimmusayen ti lakay a biktima ti napasamak a desgrasya iti ili ti San Nicolas idi Mayo 29, 2021, aldaw ti Sabado.
Ti biktima ket residente iti Barangay 1, San Francisco iti nasao nga ili idinto a ti nakadungpar kenkuana a nakamotorsiklo ket agnanaed iti Barangay 51-A, Nangalisan ditoy ciudad ti Laoag.
Maipalagip nga agpapaabagatan a direksyon ti nakamotorsiklo idi nadungpar na ti dumalyasat a lakay a naggapo iti daya ken agpalaud met a direksyon.
Gapo iti daytoy, nagsagaba sugat iti ulo ken barukong na ken natukkol ti akin-kannawan a saka na isut gapo na a dagus a naitaray itiGovernor Roque Ablan Sr. Memorial Hospital ditoy ciudad.
Nupay kasta, bayat a maag-agasan iti sumagmamano nga aldaw ket pimmusay ti biktima gapo iti sinagaba na a sugat iti nagduduma a bagi na.
Mainaig iti daytoy, iyur-uray met ti PNP no anya ti pinal a desisyon ti pamilya ti biktima seknan iti daytoy.
