LAOAG CITY – Naalaan ti maatap a shabu ti lalaki a nangdanog iti magmagna nga indibidual iti Barangay 16 Quiling Sur iti siudad ti Batac.
Nabigbig ti suspek a ni Randy Giron y Aurelio, agtawen ti 45, naasawaan, empleado ti maysa a kompania ken residente ti Barangay Quiom iti siudad ti Batac idinto a ti biktima ket nabigbig a ni Jonathan Publico y Policarpio, agtawen ti 46, naasawaan ken residente ti Barangay 17 Tabug iti nasao a siudad.
Segun ken ni P/Lt.Col. Adrian Gayuchan, Hepe ti Batac City Police Station, kabayatan ti panangiwayatda ti surveillance, magmagna ti biktima iti paset ti Quiling Sur – Salbang Paoay Road ket idi nakita ti suspek ti biktima ket ditoy a kinomprontarna daytoy no apay adda pay laeng isuna iti lugar.
Inbatadna a kalpasan ti panangibagana ti saludsod ket kellaat a dinanog ti suspek ti biktima iti sumagmamano a daras iti nagduduma a paset ti bagi ti biktima.
Inlawlawagna a kinamat ti surveillance team kaduada ti biktima ti suspek iti Barangay 6 San Julian iti siudad ti Batac ket ditoy a nakitada ti suspek ken ti nagluganna a motorsiklo.
Gapu iti daytoy, natiliwda ti suspek ken nakumpiskar kenkuana ti maysa a pedaso ti heat sealed transparent plastic sachet a naglaon ti maipagarup a shabu iti belt bag-na a naimatangan dagiti barangay officials ken pannakabagi ti media.
Kunana a ti nakumpiskar nga ebidensia dagiti otoridad ket agdagsen ti sumurok-kumurang maysa a gramo nga agbalor ti 3,400 a pisos.
Naammoan nga agam-ammo ti biktima ken ti suspek ken agpada a saanda a nabartek idi napasamak ti insidente.
Kabayatanna, napilaanen ti kaso ti suspek gapu iti panaglabsingna iti Physical Injury ken Republic Act No. 9165 wenno ti Comprehensive Dangerous Drugs Act of 2002.
