LAOAG CITY – Maysa nga agtawen iti 20 a lalaki idiay Ireland ti nakagun-od ti world record gapu iti kinapaspasna a mangbukel ti ay-ayam a Mr. Potato Head.
Kinumpirmaran ti records keeping organization a Guinness World Records a ni Declan McFerran ti baro a record holder ti titulo a “Fastest Time To Assemble Mr. Potato Head” kalpasan a naaramidna iti nasao nga ay-ayam iti uneg laeng ti 5.15 seconds.
Ti Mr. Potato Head ket maysa a toy puzzle a napartuat idi 1949 ni George Lerner. Daytoy ket immuna a nairuar ti toy company nga Hasbro idi 1952. Daytoy ket maysa a plastik nga agsukog ti patatas nga addaan ti nagduduma a paset ti bagi kas ti mata, agong, lapayag ken bibig a mabalin nga ikabil ken ikkaten.
Gapu iti daytoy, mabalin a balbaliwan dagiti ubbing ti rupa ni Mr. Potato Head iti nagduduma a wagas nangruna ket simmikat iti nasao nga ay-ayam idi 1990s kalpasan nga inaramidda daytoy a karakter iti animated movie a Toy Story.
Saan a naaddaan ti Mr. Potato Head ni McFerran idi ubing pay isuna. Nakaiggem laeng daytoy idi mabasana maipapan iti Guinness Book of World Records ken napanunutanna nga artapan ti previous record holder daytoy.
Kalpasan a nagun-od ti Guinness certification, plano ni McFerran ti sumaruno a world record nga artapanna.
