LAOAG CITY – Nabirukan a maysan a bangkay ti nakamotorsiklo a lalaki kalpasan a natennnag iti waig iti paset ti Piddig-Carasi road bisinidad ti Brgy. Abucay iti ili ti Piddig.
Binigbig ti PNP-Piddig ti biktima a ni Harold Reyes y Sebastian, agtawen ti 33, residente ti Brgy. Sta. Maria iti nasao nga ili.
Basar ti imbestigasyon ti PNP, napan nakiinom ti biktima iti am-ammo na idi domingo, setyembre 5 ken agarop alas-7:30 iti rabii a nagpakada nga agawiden.
Nupay kasta, saanen a napasangpet ti pamilya na agingga a nabirukan laengen a bangkay iti nakatennagan na a waig.
Inbatad ti PNP a possible a naovershoot ti biktima ti iturturong na a motorsiklo a nagresulta iti pannakatennag na iti waig kangrunaan na ket nakainom ti nasanger.
Basar iti post mortem examination nga inyuswat ti Municipal Health Office (MHO) iti ili ti Piddig, ti biktima ket nagsagaba ti sugat iti ulo na nga isu ti maitudtudo a rason ti nakatayan na.
Naamoan a ti waig a nakaalan ti bangkay ti biktima ket addaan ti kauneg nga 4 agingga iti 5 a metro.
