LAOAG CITY – Inarestar ni Police Major Jephre Taccad, hepe ti PNP-Pinili ti maysa a lalaki gapo iti saan na a panagisuot ti face mask kabayatan nga adda iti ruwar.
Nabigbig daytoy a ni Glenn Tugas y Balbas, agtawen ti 37, construction worker ken residente iti Sitio Chico, Brgy. Darat, Pinili, Ilocos Norte.
Basar iti report, nakita a mismo ni Taccad ni Tugas nga awan ti suot na a face mask ken saan a nakahelmet bayat a nakamotorsiklo.
Gapo iti daytoy, sinaludsod ni Taccad no addaan ni Tugas ti pass slip wenno anyaman a mangipaneknek a mangipalubos nga adda iti ruwar ngem napaay a nangipresentar rason nga inarestar na ti lalaki.
Manamnama met a sumango ti kaso ni Tugas kas iti panagsalungasing iti Article 151 iti Revised Penal Code, RA 11469 wenno Bayanihan to Heal as One Act ken Executive Order No. 67-20 wenno An Order Requiring the Use of Face Mask.
