LAOAG CITY – Natiliw ti maysa a lalaki iti naisayangkat a drug buy-bust operation iti paset ti Barangay 22, Catuguin iti ili ti San Nicolas.
Nabigbig ti suspek a ni Edrinito Pucan Jr., agtawen ti 24, baro ken residente iti Barangay 4, Nalupta iti ciudad ti Batac.
Ni Pucan ket High value individual ditoy probinsya, Top 10 regional priority target ken miembro ti Rapisora group.
Ti operasyon ket naiyuswat babaen ti nagtitipon a pwersa ti Provincial Drug Enforcement Unit wenno PDEU, Provincial Intelligence Unit, Regional Drug Enforcement Unit ken ti Philippine Drug Enforcement Unit ditoy probinsya.
Naamoan a tiniliw a dagus dagiti otoridad ni Pucan kalpasan a naglako ti maysa a sachet a naglaon ti maipagarop a shabu iti maysa a kameng ti PDEU a nagpammarang a poseur buyer.
Malaksid iti inlako ni Pucan ket nakumpiskar pay dagiti otoridad iti ikot na ti pito a sachet a naglaon ti maipagarop a shabu ken sangaribo a pisos a nausar iti operasyon.
Nagkedked metten ni Pucan nga agpainterview pay iti Bombo Radyo Laoag.
Kabayatanna, isagsaganan ti PDEU nga idadaulwan ni Police Chief Master Sergeant Harold Nicolas ti reklamo a panaglako ken panagikot ti illegal a droga kontra ken ni Pucan.
Inbaga ni Nicolas a maibilang a bigtime drug pusher ni Pucan gapu ta saan laeng nga iti ciudad ti Batac ti paglaklakoan na iti illegal a droga no di ket uray iti kabangibang nga ili karaman ditoy ciudad ti Laoag.
