LAOAG CITY – Nagbalin nga emosyonal ni Mr. Jonel Pascua, taga Barangay Sto, Niño, Nueva Era, Ilocos Norte iti pannakatiliw na iti naisayangkat a drug buy-bust operation iti laud ti Ilocos Norte Electric Cooperative (INEC) iti paset ti Barangay 21 iti ili ti Sarrat.
Segun ken ni Pascua, aggapo da iti ili ti Nueva Era ken umayda koma ditoy ciudad ti Laoag a nakamotorsiklo kadwa na ti masikog nga asawa na tapno mangipan ti sangasalup a bagas iti katugangan na idi pinara da dagitoy iti nasao a lugar.
Ditoy a maipagarop nga inakusaran da ni Pascua nga aglaklako iti illegal a droga ngem naiget a naglikudan na.
Inpasingked na a saan nga aglaklako iti illegal a droga ken awan pulos ti bisyo na gapu ta masayangang ti pagbisyu na kangrunaan na ket babassit pay dagiti annak na.
Uray ti asawa ni Pascua ket nagbalin nga emosyonal kabayatan ti panangipetpetteng na nga awan ti dakes nga ar-aramiden ti asawa na.
Nupay kasta, inbatad ni Police Chief Master Harold Nicolas ti mangidadulo iti Provincial Drug Enforecement Unit (PDEU) a napan da laeng tinulungan ti PNP-Dingras.
Inlawlawag na a nagpatulong ti PNP-Dingras kalpasan a nagbaliw ti nakaisayangkatan ti operasyon da imbes nga iti sentro iti ili ti Dingras.
Innayon ni Nicolas a no adda ti matiliw da gapu iti illegal a droga ket naipagagangayen a paglikudan da ken ibaga da a saanda a bagi ti naala kadakuada nga ebidensya.
Inpetteng ni Nicolas nga adda ti napasamak a transaksyon babaen ti nagpammarang a poseur-buyer manipod iti PNP-Dingras.
Nakumpiskar dagiti otoridad iti ikot ti suspek ti maysa a sachet a naglaon ti maipagarop a shabu, sangaribo a pisos ken cellphone ti subject ti operasyon.
Iti agdama, nagtalinaed ni Pascua iti kostudyar ti PNP Dingras idinto a dagiti naala kenkuana a maysa a sachet a naglaon ti maipagarop a shabu ket naipan iti crime lab.
