LAOAG CITY – Binagkong ti maysa a lalaki ti bukudna nga uliteg iti Barangay 13 ditoy siudad ti Laoag.
Ti biktima ket agtawen ti 51, balo idinto a ti suspek ket agtawen ti 30, awanan asawa ken agpada dagitoy a residente iti Barangay 13 ditoy siudad ti Laoag.
Basar iti Laoag City Police Station, kabayatan ti panaginum ti arak ti aguliteg iti sirok ti salamagi ket kagiddan met ti panangbalakad ti biktima iti suspek no sadinno a saan a nagbayag ket nagawid ti suspek iti pagtaenganda.
Nupay kasta, apaman a nagsubli daytoy ket kellaat a binagkongna ti ulitegna kabayatan nga agtugtugaw babaen ti jungle knife iti akinkannigid a takiagna.
Naammoan a ginandat pay a bagkongen manen ti suspek ti biktima ngem napan naganawa ti ina ti suspek a kabsat ti biktima.
Gapu iti daytoy, insigida a naglibas ti suspek iti saan a masinunuo a direksion idinto a naitaray iti Gov. Roque B. Ablan Sr. Memorial Hospital ti biktima para iti pannakatamingna ngem nakaruar met laeng daytoy iti ospital.
Babaen iti naiwayat nga hot pursuit operation ket natiliw met laeng iti suspek ken narekobre ti nausar nga immuko.
Iti agdama, nagtalinaed daytoy iti pagbaludan ken maisagsagana ti pannakaipila ti kaso kontra kenkuana.
Kabayatanna, rumrummuar a namungay ti nasao nga insidente gapu iti saan a panagkinnaawatan a nangdegdeg iti kaadda ti impluwensia ti nasanger dagitoy.
