LAOAG CITY – Maysa a lalaki idiay China ti nakagun-od ti world record gapu ta kabaelanna nga agparsiak a tuluy-tuloy nga arig water fountain.
Kinumpirmaran ti records keeping organization a ti agtawen ti 25 a ni Ma Hui ti baro a record holder ti titulo a “Longest Time to Spray Water from the Mouth.”
Daytoy ket kalpasan a nagparsiak ti danum manipud iti ngiwatna a tuluy-tuloy iti uneg ti 5 a minuto ken 51 a segundo.
Imminom ti uppat a litro a danum ni Hui sumagmamano a minuto sakbay nga inaramidna ti official record attempt.
Ti water spouting ket maysa a klase ti talento a nangrugi pay idi 17th century. Daytoy ket maiyus-uswat ti panaginum ti adu a danum.
Babaen ti muscle control, isubli ti danum manipud iti buksit nga umuli iti ngiwat tapno iparsiak daytoy a rummuar nga arig water fountain.
Malaksid ken ni Hui ti maysa nga addaan ti talento daytoy ket ti nalatak a magician ken illusionist a ni David Blaine.
Segun ken ni Blaine, ti sobra a kinarigat ti water spouting, dimmanon daytoy iti 10 a tawen sakbay a masursuro a maaramid daytoy.
