LAOAG CITY – Nakairekord ti baro a world record ti maysa nga agtawen ti 53 a lalaki idiay Poland kalpasan a timmakder iti tangke a napnoan ti yelo.
Kinumpirmaran ti records keeping organization a Guinness World Records a ni Lukasz Szpunar ti baro a world record holder ti titulo a “Longest Duration Full Body Contact with Ice.”
Daytoy ket kalpasan a naileppasna a maiyupor ti buo a bagina iti yelo iti uneg ti uppat nga oras ken dua a minuto.
Tapno magun-od ken bigbigen ti Guinness ti record attempt, masapol a nakaupor ti buo a bagi iti yelo malaksid iti ulo ken tengnged. Kasapulan pay a swimming trunks laeng ti suot ti kumarit iti world record.
Malaksid iti daytoy, nagsuot ni Lukasz ti mouth guard tapno saan a maperdi ti ngipen gapu iti panagtegergerna gapu iti nakaro a lamiis.
Tapno maipasigurado a natalged ni Lukasz, adda ti maysa a medical team a naka-monitor iti body temperature daytoy ken nakatutok pay dagitoy no adda met laeng puotna daytoy.
Inbatad ni Lukasz, ti karigatan a paset ti world record attempt-na ket ti umuna nga oras a pannakaiyuporna iti yelo.
Nakarikna daytoy iti panagtegerger ngem saan a nagbayag ket nasanay met laeng daytoy iti kinalamiisna. Nagsubli laeng ti panagtegergerna iti maudi a minuto a nakaupor iti yelo.
Saan daytoy ti umuna nga ice challenge ni Lukasz gapu ta nagbalin daytoy a runner-up ti Polish Walrus Championships no sadino uppat nga oras a nakaupor iti near-freezing water.
