LAOAG CITY – Tiniliw dagiti kameng ti PNP-San Nicolas ti maysa a lalaki gapu iti saanna a panagbayad iti naginumanna a videoke bar nga umabot ti 2,800 a pisos iti Barangay 16 iti nasao nga ili.
Nabigbig daytoy a ni Mark Anthony Campus, agtawen ti 26, awanan ti trabaho ken residente iti Barangay 8, San Rufino iti nasao nga ili.
Basar ti report, napan naginom ti suspek iti nasao a videoke bar ngem idi nabarteken ket maipagarop a rimuar lattan a saan pay a nakabayad ken pinataray na a dagus ti kurung-kurung na a nagpa-abagatan a direksyon.
Nupay kasta, nasiputan dagiti dadduma nga aggiinom ken ti cashier a ni Dominador Cabanse, agtawen ti 20 ken residente iti Barangay 7 iti ili ti San Nicolas isut gapuna a kinamat da ni Campus.
Naamoan nga idi nakadanun ti suspek iti ciudad ti Batac ket nagsubli met laeng iti ili ti San Nicolas ken ditoyen a tiniliw da babaen ti tulong dagiti kameng ti pulisya.
Iti agdama, nagtalinaed ti suspek iti kustodyar ti pulisya ngem naamwan a plano a kasarita dagiti agpapaay ti videoke bar apaman a mausawan.
Nagkedked a nagpainterview ni Campus iti Bombo Radyo ngem inadmitir na nga ti reklamo kontra kenkuana.
