LAOAG CITY – Napilaan ti kaso a panagsalungasing ti RA 8353 wenno Anti-Rape Law ti maysa a lalaki nga agtawen ti 50, awanan ti asawa ken tubo iti Brgy. Mangngato ditoy siudad ti Laoag ngem agdama nga agnanaed iti ili ti Solsona.
Daytoy ti kinumpimaran ni PMaj. Chris Anthony Sorsano, ti hepe ti PNP-Solsona.
Segun ken ni Sorsano nagkamang iti PNP ti ina ti agtawen ti lima a biktima ti suspek gapu iti pannakaabuso daytoy.
Inbatadna a kalpasan a naalanda ti palawag ti ubing ken ti ina, dagus a tiniliw da ti suspek.
Immuna iti daytoy, inlawlawag ni Sorsano a bayat nga agay-ayam iti ruar ti biktima ket inayaban daytoy ti suspek a sumrek da iti pagtaenganna ken dita a ginundawayan na daytoy.
Inpakaamo ni Sorsano a ti suspek ket pagayaman met laeng ti lolo ti ubing.
Kabayatanna, nagtalinaed iti kustodyar ti PNP-Solsona ti suspek bayat a maisagsagana ti maipila a kaso kontra kenkuana.
