LAOAG CITY – Pimmusay ti maysa a lalaki kalpasan a nalmes iti Bislac River Omok ni Siwawer iti bisinidad ti Brgy. 10-Parparoroc iti ili ti Vintar.
Nabigbig ti biktima a ni Noryel Pasion y Retundo, agtawen ti 40, addaan ti live-in partner ken residente iti nasao a barangay.
Segun ken ni PMaj. Arnel Tabaog, hepe ti PNP-Vintar, napan nagdigos ti biktima ken ti live-in partner na a ni Thelma Foronda y Jimenes, agtawen ti 54 iti nasao a karayan.
Kabayatanna, nag-dive ni Retundo iti naadalem a paset ti karayan ken kalpasan ti sumagmamano a minutos ket saan metten a simmangsang-at daytoy.
Gapu iti daytoy dagus a naiyuswat ti Search and rescue operation babaen kadagiti empleado ti Omok ni Siwawer/MDRRMC.
Naamoan nga immabot iti maysa nga oras sakbay naiyaon ti biktima ken dagus a naitaray iti Gov. Roque Ablan Sr Memorial Hospital ngem naideklara a dead on arrival daytoy.
Kabayatanna, naamoan a sakbay a nagdigos iti karayan ket imminom ti biktima ti uppay a bote ti arak.
