LAOAG CITY – Balligi a naarestar ti maysa a lalaki iti Anti-Illegal Drug Buy-bust Operation iti ili ti Bacarra.
Ti suspek ket agtawen ti 38, naasawaan, residente ti Barangay 40 Buyon iti nasao nga ili.
Basar iti Bacarra Municipal Police Station, natiliw ti suspek kalpasan a maipagarup a naglako ti tallo a pedaso ti heat-sealed transparent plastic sachet a naglaon ti maatap a shabu iti police poseur-buyer.
Malaksid iti daytoy, naala pay manipud iti suspek ti maysa a sachet a naglaon ti dua a pedaso ti heat sealed transparent plastic sachet a naglaon ti mapapati a shabu ken dadduma pay a drug paraphernalia.
Naammoan a ti nakumpiskar a kontrabando ket agdagsen ti sumurok-kumurang maysa a gramo nga agbalor ti 6,800 a pisos.
Kabayatanna, sumango ti suspek iti kaso gapu iti panaglabsingna iti Comprehensive Dangerous Drugs Act of 2002.
