LAOAG CITY – Nabagkong ti maysa a lalaki ti namitlo a daras babaen ti maysa a menor de edad iti Barangay 23, Sta. Cecilia iti ili ti San Nicolas.
Ti biktima ket agtawen ti 26 idinto a ti suspek ket agtawen ti 16 nga agpada dagitoy a residente iti nasao a barangay.
Segun ken ni P/Cpt. Sygman Benigno, Hepe ti San Nicolas Municipal Police Station, kabayatan ti birthday party ti pamilia ti biktima ket kellaat nga adda ti nabasada a post iti social media ti maysa kadagiti miembro ti pamilia ti suspek a saanda a nagustoan.
Gapu iti daytoy, rinaot ti pamilia ti biktima ti pamilia ti suspek no sadinno a puersa a simrekda iti pagtaengan ket ditoy a kinomprontarda isuda.
Pinadas nga aganawa ti ina ti suspek ngem nasugatan laeng ti ulona gapu iti panaganawana.
Inlawlawagna idi kellaat nga iniwa ti biktima ti tengnged ti suspek babaen ti nabuong a bote ket napan met nangala ti kutsilyo ti suspek nga inusarna a nangbakong iti paset ti akinkannawan nga abaga ken tengnged ti biktima iti namitlo a daras.
Naitaray ti biktima iti Mariano Marcos Memorial Hospital and Medical Center iti siudad ti Batac para iti pannakatamingna ken saan a nagbayag ket nakaruar met laeng daytoy iti ospital idinto a boluntario a simmuko ti suspek kadagiti otoridad iggem ti inusarna iti pammagkong.
Naammoan nga addan ti dati a susik dagiti dua a pamilia ken adda dagiti gundaway nga adda dagiti saanda a panagkikinnaawatan a mangitunda ti panagriririda.
Kabayatanna, addan ti panagsinnarita ti dua a pamilia no sadinno a saanen nga interesado a mangipila ti reklamo ti pamilia ti biktima kontra iti suspek a menor de edad.
