LAOAG CITY – Natiliw ti maysa a lalaki kabayatan ti naiyuswat a drug buy bust operation iti paset ti Barangay 4 ditoy ciudad ti Laoag.
Nabigbig ti subject ti operasyon a ni Teddy Mandac Jr., agtawen ti 48 ken residente iti Barangay 2 ditoy ciudad.
Nakumpiskar kenni Mandac ti maysa a sachet a naglaon ti maipagarop a shabu, 500 a pisos a buy bust money, malaksid laeng iti naala iti ikot na a dua a sachet a naglaon met laeng ti maatap a shabu, wallet, cellphone ken lighter.
Basar ti PNP-Laoag, datin nga adda ti kaso ni Mandac mainaig met laeng iti droga ken nakapagyansa ngem agtultuloy a madengdengeg ti kaso na.
Inbatad pay dagiti kameng ti PNP ditoy ciudad a nabayagen a masipsiputan ni Mandac ken idi napaneknekan a nagsubli iti iligal nga aramid na ket inwayat da ti operasyon.
Mainaig iti daytoy, naiget met a naglikudan ni Mandac a kukua na dagiti nakumpiskar a droga.
Inlawlawag na a bayat nga agtartarimaan iti ridaw iti kasera ti ipag na iti maikadwa a kadsaaran ti pasdek ket maipagarop a kellaat a napan dagiti pulis ken pinagpakleb da isuna.
Inakusaran pay ni Mandac nga inkabil dagiti pulis ti kwarta ken ti iligal a droga gapo ta inpetteng na a saan nga agus-usar.
Innayon na a saan na nga ammo no anya ti rason a naiwayatan ti operasyon.
Kabayatanna, nnbatad ni Mrs. Mina Calahi a nakigtot iti pannakaiyuswat ti drug buy bust operation a nakatiliwan ni Mandac bayat ti kaadda na iti pagkaseraan da iti Barangay 4 ditoy ciudad ti Laoag.
Segun kenni Calahi, bayat nga agtartarimaan ni Mandac iti ridaw ti kwarto na ket awan ti kadwa na iti maikadwa a kadsaaran ti pagkaseraan rason a masdaaw no apay nga adda ti transaksyon ken adda dagiti naala nga iligal a droga.
Inpetteng na a sipud idi natiliw ni Mandac idi 2014 mainaig met laeng iti iligal a droga ket saanen a nagusar wenno naglaklako.
