LAOAG CITY – Natay ti maysa a lalaki kalpasan a naaksidente iti Batac-Paoay Road iti Brgy. Salbang iti ili ti Paoay.
Segun kenni Police Lt. Rodel Baradi, OIC ti PNP Paoay, nakaawat da ti tawag manipud iti RHU pasado alas-otso idi rabii seknan ti aksidente.
Binigbig ni Baradi ti biktima a ni Rogelio Dagum Jr y Doromas, agtawen ti 35, salesboy, tubo ti Brgy. Arnap, Cabugao, Ilocos Sur ken agnanaed iti Brgy. San Agustin iti nasao nga ili.
Kuna na a bayat nga agpapalaud ti biktima ket aksidente a nasapgud na maysa a poon ti Gmelina iti igid ti kalsada ken naipurwak iti agarup 20 a metro.
Inbatad ni Baradi a dagus nga intaray dagiti kameng ti RHU iti Mariano Marcos Memorial Hospital and Medical Center iti siudad ti Batac ngem naideklara a dead on arrival.
Possible a saan a nakasuot ti helmet ti biktima gapu ta nasugatan ti likod a paset ti ulo na nupay adda ti nakita da a helmet iti nakapasamakan ti insidente.
Innayon ni Baradi a nakiinom ti biktima iti siudad ti Batac sakbay a naaksidente.
