LAOAG CITY – Natay ti maysa a lalaki kalpasan a nagbekkel iti Sitio Rang-ay iti Brgy. Cali iti ili ti Dingras.
Nabigbig ti biktima nga agtawen iti 30, awanan asawa ken residente iti nasao met laeng a barangay.
Basar iti Dingras Municipal Police Station, nakita ti kabsat ti biktima a ni Armando Verdadero y Manera, agtawen iti 47, naasawaan ken residente iti nasao a barangay a nakabitinen ti biktima iti bobeda iti pagtaenganda babaen iti tali a nylon nga agmaris ti yellow ken agatiddog ti dua a metro no sadinno a dagusna daytoy nga inukas.
Iti imbestigasion dagiti otoridad, sakbay a napasamak ti insidente ket nagiinom ti biktima kaduana dagiti kasinsinna.
Naammoan a kalpasan ti panagiinomda ket nagawid ti biktima nga agmaymaysa.
Kabayatanna, maibasar iti post-mortem examination nga inyuswat ni Dr. Susan Calaoagan, Municipal Health Officer iti ili ti Dingras ket rumrummuar a pimmusay ti biktima gapu iti asphyxia secondary to strangulation ken awan ti foul play a napasamak.
