LAOAG CITY – Maysa a soccer fan idiay Brazil ti nakagun-od ti world record gapu iti kinaadu ti koleksion ti jersey dagiti sikat a soccer players.
Kinumpirmaran ti records keeping organization a Guinness World Record a ni Cassio Brandao ti baro a record holder ti titulo a “Largest Collection of Soccer Shirts” gapu iti koleksion daytoy a dumanonen iti 6,101 shirts.
Inbatad ni Brandao, nangrugi isuna nga agkolektar kadagiti soccer jersey idi 2000. Amin a soccer jersey iti koleksionna ket napateg ngem ti ibilangna a priceless ket ti jersey ti pimmusay a soccer legend a ni Edson Arantes do Nascimento wenno mas am-ammo iti nagan a Pele.
Iti kinaadu ti koleksionna, saannan a maidulin iti pagtaenganda ken inkabilna dagitoy iti opisina ti inpatakderna a collector’s club nga Alambrado Soccer & Culture idiay Sao Paulo, Brazil.
