LAOAG CITY – Natiliw ti dua nga indibidual kalpasan a maipagarup a nagtakaw ti nagduduma a kagamitan iti maysa bus trans iti Barangay 55-B, Salet Bulangon ditoy siudad ti Laoag.
Naammoan a dagiti suspek ket agtawen ti 31 ken 22, agpada nga awanan asawa ken residente dagitoy iti Barangay 3 ditoy siudad ti Laoag.
Basar iti Laoag City Police Station, kabayatan a dumaldalyasat ti maysa a mekaniko iti nasao a bus trans a nakalugan ti kurong-kurong ket adda ti immasideg kenkuana a nangipakaammo nga adda ti dua nga indibidual a maipagarup nga agtaktakaw ti scrap materials manipud iti parking area ti nasao a bus trans.
Gapu iti daytoy, insigida nga inpakaammo ti mekaniko daytoy a pasamak iti on-duty security guard no sadinno a naobserbaran ti security guard nga adda ti dua nga indibidual a nakatakder iti parking area.
Iti panangobserbarna kadagiti suspek, nalasinna a dagiti maseknan nga indibidual ket isu ti bimmaba iti tricycle.
Naglugan ti security guard iti kurong-kurong ti mekaniko ken insigida a nagturongda iti lugar.
Mainaig iti daytoy, apaman a nakasangpet ti security guard ken ti mekaniko ket nakitada nga agibagbagkat dagiti suspek ti sumagmamano a banag iti tricycle.
Apaman a naikargada dagiti sumagmamano a banag ken idi tumalaw dagitoy ket sinita isuda ti security guard ken ti mekaniko.
Iti panaginspeksion iti uneg ti tricycle, nakita ti maysa a sako ken maysa a bus radiator iti uneg ti tricycle.
Sinaludsod ti security guard dagiti suspek no nangalaanda ti bus radiator ket intudoda ti parking area ti bus trans.
Narekobre ti maysa nga ECU Wiring Harness, maysa a Sensor Wiring Harness ken maysa nga small Wiring Harness.
Narekobre pay iti uneg ti sako ti sumagmamano a kagamitan kas ti cutting ken dismantling materials kas ti maysa a martilyo, maysa a wire cutter ken maysa a kutsilyo.
Naarestar dagiti suspek babaen kadagiti otoridad ken dagiti natakaw a kagamitan ket naited kadagiti kapulisan para iti naan-anay nga imbestigasion.
Basar iti Spare Parts Quotation nga inyisyu ti Goldenasia Automotive Builders Inc. nga isu ti motor parts provider ti nasao a bus trans, ti Intercooler Assembly wenno ad-adda nga ammo a Radiator ket agbalor ti Php34,100.00, ti ECU Wiring Harness ket Php43,300.00, ti Sensor Wirings Harness ket Php42,480.00 idinto ti Small Wiring Harness ket agbalor ti Php22,920.00 nga adda ti pakabuklan a Php142.800.00.
