LAOAG CITY – Manamnama ti panangsukon ti pamilia ti maysa a lalaki nga agwarang-warang iti Brgy. Pulangi iti ili ti Bacarra.
Segun ken ni P/Lt.Col. Roldan Suitos, Hepe ti Philippine National Police iti ili ti Bacarra, nabigbig ti lalaki a ni Mario Mendoza Jr., agtawen iti 32 ken residente idiay Makati ngem nakita dagiti sumagmamano a residente daytoy nga arig saanna a masinunuo ti papananna.
Inbatadna nga adda ti naawatda nga impormasion nga adda ti maysa a lalaki a pagat-atapan ti garawna isu a dagusda a napan nagresponde iti nasao a lugar.
Kunana nga apaman a nakadanon dagiti otoridad iti lugar ket ditoy a sinitada ti lalaki ken naobserbaranda nga arig ket mapukpukaw iti panunotna ken narugit iti bagina.
Gapu iti daytoy, inlawlawag ni P/Lt.Col. Suitos a napanda inkabil ken inpakita iti Municipal Health Office ti lalaki ken nakikoordinarda metten iti Department of Social Welfare and Development para iti pannakaasikaso daytoy.
Mainaig iti daytoy, inpalgakna nga idi addan iti nasayaat a kondision ti lalaki ket nakasarsaritada isuna ken ditoyda a naammoan dagiti sumagmamano a napateg nga impormasion maipanggep kenkuana.
Babaen iti daytoy, kunana a naalada ti impormasion ti pamiliana nga adda idiay Makati no sadino kinontakda dagus ti ina ti lalaki tapno maipakaammo kadakuada ti napasamak.
Innayonna a naammoanda pay iti ina ti lalaki nga idi pay laeng Pebrero a mapukpukaw ti anakna agingga a saanda a nabirukan daytoy.
