LAOAG CITY – Pinaltogan ti agtawen ti 36 a lalaki ti kasinsin na iti Barangay Sta. Cruz Sur iti ili ti Badoc.
Segun iti Philippine National Police, ti biktima ket agtawen ti 32, maysa a mannalon ken residente iti Sitio 4 iti nadakamat a barangay.
Iti inisyal nga imbestigasyon dagiti otoridad, nagprobokar ti biktima ken napan naganawa ti suspek ngem saan a nagsardeng ti maseknan rason a napan innala ti suspek ti paltog na agingga a napasamakan ti pammaltog.
Naamoan a kalpasan daytoy ket nakita ti dara-dara a biktima iti asideg ti bubon da iti likod ti pagtaengan da.
Nakarekobre met dagiti otoridad ti maysa a kapsula ti kalibre 45 a paltog.
Mainaig iti daytoy, kalpasan ti krimen ket dagus a naglibas ti suspek ken tugot na ti paltog nga inusar na idinto a ti biktima ket naitaray iti Sto. Cristo Milagroso Hospital iti ili ti Sinait.
Agpapan maisur-surat ti damag ket saan pay a masinunuo no sadinno a paset ti bagi ti biktima ti natamaan.
Iti agdama ket agtultuloy pay laeng ti naun-uneg nga imbestigasyon ti pulisya ken manhunt operation para iti pannakatiliw ti suspek.
