LAOAG CITY – Agsursor ti sibubukel a grupo ti City Disaster Risk Reduction and Management Office iti intero a siudad ti Laoag kangrunaanna kadagiti pagdidigusan iti nagduduma a beach resorts ditoy siudad.
Segun ken ni Dr. Melvin Manuel, ti mangidadaulo iti nasao a pangopisinaan, daytoy ket kas paset iti panagsagsaganada iti mapaspasangasangan a Semana Santa.
Inbatadna a nakikammayetda kadagiti barangay captains ditoy siudad gapu ta dagitoy ti kangrunaan a katinnulongan iti panangmonitor kadagiti umili nga agturong kadagiti beach resorts.
Inlawlawagna a malaksid kadakuada ket adda pay ti pannakikoordinarda iti Philippine Coast Guard a nakabase iti Brgy. Lapaz ditoy siudad ti Laoag nga agbantay para iti seguridad dagiti tattao.
Kunana a kaduada ti Business Permit and Licensing Office a mapan agsursor kadagiti beach resorts ditoy siudad ita a lawas.
Kabayatanna, inpakaammo ni Dr. Manuel a ti agbantay a lifeguard ket masapol a dumalan kadagiti accredited agencies kas ti Philippine Coast Guard tapno adda met laeng ti adal dagitoy maipapan iti panangisalakan kadagiti malmes nga indibidual.
Innayonna nga adda dagiti Non-Government Organizations a kabinnuligda kas ti Media, Pugad Lawin, Kabalikat, Fariñas Fire Brigade ken dadduma pay.
