LAOAG CITY – Pinadayawan ti Commission on Population and Development-Region 1 ti Laoag City kas 3rd place iti prestihioso a 2025 Rafael M. Salas Kaunlarang Pantao Award (RMSKPA) a naisayangkat idiay Pangasinan.
Inbatad ni Mrs. Janet Retamal, mangidadaulo ti Population Commission ditoy siudad ti Laoag, daytoy a pammigbig ket maipanggep kadagiti programa nga inaramid dagiti Local Government Units tapno mapasayaat ken mapapintas ti biag dagiti umili iti nagduduma a lugar.
Inlawlawagna a kadagupan kadagiti siam a siudad iti rehion uno ket nagun-od ti Laoag City ti maikatlo a puesto.
Kunana a paset daytoy ti tinawen a Search for the Most Outstanding LGU for localizing the Population and Development (POPDEV) agenda.
Malaksid iti daytoy, nabigbig pay ti Commission on Population and Development-Region ti Laoag City Population Office gapu iti implementasion ti Regional Population and Development Plan of Action (RPD-POA) 2023-2028 iti komunidad.
Nagyaman ni Retamal kadagiti amin a nagbalin a kinabinnuligda nga ahensia, Heads of Offices, Punong Barangays, dagiti empleado ti City Population and Development Office, City Council gapu ta patienna a gapu iti tulong ken suporta iti tunggal maysa ti nagbalin a rason no apay a nagun-odda daytoy a naisangsangayan a pammadayaw.
