LAOAG CITY – Nagun-od ti Laoag City Team ti three-peat iti kaliplippas a Region 1 Athletic Association Meet a naisayangkat idiay Candon City, Ilocos Sur.
Daytoy ket kalpasan a naiyawid ti Laoag City Team ti 93 gold, 69 silver ken 61 bronze medals.
Malaksid iti pannakagun-od ti Laoag City Team iti namitlo a nagsasaruno a daras a kampeonato ket nagun-odna pay ti record breaking gapu ta naartapanna ti bilang ti medalya dagiti immun-unan a panagkampeonna no sadinno nga idi 2024 ket addaan ti 79 gold, 53 silver ken 68 bronze ken idi 2025 a 82 gold, 85 silver ken 56 bronze.
Ti kampeonato ket inawat a mismo ni Mayor James Bryan Alcid kaduana ni Dr. Joann Corpuz, Laoag Schools Division Superintendent kabayatan ti Awarding ken Closing Ceremony idiay Candon City.
Malaksid ti Over-All Championship, nagun-od pay ti Laoag ti Special Award a Best Performing Division in Gymnastics, Taekwondo ken Weightlifting.
Napadayawan met dagiti sumagmamano nga atleta kas Most Bemedalled Laoag City Student-Athletes nga isuda:
– Jaeden Troy Tabbada
5 Gold, Aerogymnastics
– Reign Dainielle Palermo
5 Gold, Aerogymnastics
– Romnick P. Tabay
5 Gold, Gymnastics MAG
– Carl Dwayne D. Macatuggal
5 Gold, Swimming Boys Secondary
Naammoan a ti Most Medal Garnered ket ti Gymnastics nga addaan ti 42 gold, 24, silver ken 7 bronze medals.
Maipalagip a nagballigi ti Schools Division Office of Laoag City iti Region 1 Athletic Association Meet idi tawen 2024 ken 2025.
