LAOAG CITY – Inpakaammo ni Engr. Shiela Opelac, mangidadaulo ti City Agriculture Office a maiyur-uray laengen ti panangikonektar ti Ilocos Norte Electric Cooperative wenno INEC ti kuntador ti Laoag City Tobacco Livelihood Training Center sakbay a naan-anay nga agoperar daytoy.
Segun kenkuana, adda laeng ti maiyur-uray a papeles manipud iti lokal a gobierno a maysa a resolusion a mangipalubos iti pannakaaramid ti Memorandum of Agreement iti nagbaetan ti Ilocos Norte Electric Cooperative ken ti opisinada.
Inbatadna nga apaman a malpas ti Memorandum of Agreement ket addanton ti suplay ti kuriente iti nasao a pasdek ken manamnama nga umakardanton ti opisina.
Kunana nga agdagup ti amin ti 12 a milyon a pisos ti pundo iti nasao a building manipud iti Republic Act No. 7171.
Namnamaenna nga iti kabiitan a panawen ket malpasen ti resolusion tapno makaakardan iti baro a building.
Maipalagip a daytoy ket agserbi a training center para kadagiti mannalon ditoy siudad ken pakakitaan kadagiti nagduduma a pammadayaw ti City Agriculture Office.
Inayonna a dakkel a makatulong daytoy tapno adda ti pagkamangan dagiti umili nga agkiddaw ti tulong.
