LAOAG CITY – Nakaawat ti Laoag City Police Station – Traffic Division ti maipagarup a bomb threat iti Barangay 1 San Lorenzo ditoy siudad.
Basar iti Laoag City Police Station – Traffic Division, agarup 9:17 ti rabii idi Marso 6 idi nakaawat ti tawag ti Laoag City Police Station personnel ken Ilocos Norte Provincial Explosive Ordnance Disposal and Canine Unit (INPECU) personnel manipud iti selpon nga addaan ti numero a 09928372910 a mangibagbaga nga adda ti maipagarup a bomba a naimula kadagiti lugan a naka-parking iti Laoag City Police Station – Traffic Division.
Iti naiwayat nga imbestigasion, ti nasao a report ket naawat ti duty personnel ti City Tactical Operation Center (CTOC) mainaig iti maipagarup a bomba a naikabil kadagiti tallo a lugan a naka-parking iti Laoag City Police Station – Traffic Division.
Gapu iti daytoy, insigida a nangipatungpal ti Laoag City Police Station ti safety procedure iti tulong ti Ilocos Norte Provincial Explosive Ordnance Disposal ken Canine Unit.
Mainaig iti daytoy, nangiwayat ti imbestigasion ti Ilocos Norte Provincial Explosive Ordnance Disposal and Canine Unit ket naideklarar nga awan ti bomba wenno awan ti aniaman a pakalasinan nga adda ti naimula a bomba iti lugar.
Ginutigot ti Ilocos Norte Police Provincial Office ti publiko nga agbalin a kalmado ken makikooperar kadagiti otoridad no adda ti kapada nga insidente a mapasamak.
Immapela pay ti Ilocos Norte Police Provincial Office iti publiko a liklikan ti agaramid ti ang-angaw wenno komento nga adda ti pakainaiganna iti bomba, pagpabettak wenno aniaman a maikanniwas iti paglintegan.
Kabayatanna, ti mapaneknekan a naglabsing iti linteg ket sumango iti kaso gapu iti panaglabsingna iti Presidential Decree No. 1727.
