LAOAG CITY – Nakasaganan ti Laoag City General Hospital (LCGH) a mangtaming kadagiti masugatan gapu iti paputok bayat iti panangsarabo ti baro a tawen.
Daytoy ti inpasingked ni Doctor Elizer Asuncion, ti mangidadaulo iti nasao nga ospital.
Inbatad na nga adda ti mandato kadakuada manipod iti Department of Health (DOH) a masapol nga adda ti priority lanes amin nga ospital a para kadagiti biktima ti paputok.
Mainaig iti daytoy, inlawlawag ni Asuncion nga awan ti maited a subsidiya iti LCGH nga aggapo iti DOH isut gapuna a saan a libre dagiti maipakat nga agas kadagiti mabiktima ti paputok.
