LAOAG CITY – Naduktalan iti maysa a panagadal ti Ateneo de Manila University Department of Physics ken Manila Observatory nga adda ti toxic lead iti angin ti Metro Manila uray dua a dekadan nga inikkat ti leaded gasoline iti pagilian.
Inpablaak ti Atmospheric Environment idi Pebrero 2026, tiningiting ti panagadal ti air samples idi 2018 ken 2019 usar ti lead isotope fingerprinting tapno maduktalan ti pagtataudan ti polusion.
Rimmuar iti resulta a nupay saanen a kangrunaan a pagtataudan ti leaded gasoline, agtultuloy latta a mangituntunda ti lead pollution ti industrial activities, panagpuor ti fossil fuels ken dagiti daan a kontaminasion.
Basar iti panagadal, 45% agingga 62% ti lead iti angin ket manipud iti industria idinto a 30% agingga 45% ket manipud iti fossil fuel combustion kas ti diesel ken uray unleaded gasoline.
Naduktalan pay a kaadoan iti lead pollution ket manipud iti lokal a pagtataudan ken saan nga aggapu iti sabali a pagilian gapu ta saan a nagbaliw ti chemical signature daytoy uray agsukat ti direksion ti angin iti nagduduma a panawen.
