LAOAG CITY – Nakalockdown ti Leaño St. a paset ti Sitio 5 iti Brgy. 15, San Jose iti ili ti San Nicolas.
Segun kenni Brgy. Chairman Giovani Taylan iti nasao a barangay, dagus da nga inpatungpal daytoy kalpasan a naamoan da nga adda ti nagpositibo iti barangay da a ni IN-C104.
Inbatad na nga umabot iti 23 a pamilya ti nakalockdown iti nasao a paset ti barangay.
Inlawlawag na a mangted met ti tulong ti LGU ken ti barangay kasta met kadagiti pribado a personalidad ti mangmangted ti tulong kadagiti pamilya a naapektaran.
Mainaig iti daytoy, kuna ni Taylan nga iti contact tracing nga inyuswat da ket awan ti makaam-ammo iti nagpositibo iti covid-19 gapo ta no naggapo iti pagtrabahoan na ket saanen a rumrumwar.
Kunana nga agkaskasera laeng iti Barangay da ken ti ammo na ket residente iti ciudad ti Batac.
Innayon na a dagiti pada ni IN-C104 nga agnanaed iti apartment ket saan da a nakapulapol daytoy ken saan da nga am-ammo daytoy.
Nupay kasta, kuna ti kapitan a kitaen da latta a nalaing no siasinno dagiti mabalin a nakapulapol ni IN-C104.
Iti agdama kunana a dagiti kadwa ni IN-C104 iti apartment ket naka-quarantine da amin.
