LAOAG CITY – Nagpinnirma ti gobierno probinsial ti Ilocos Norte ken ti Alba Renewables Philippines Corporation iti lease agreement para iti pannakapadur-as ti 100-ektaria nga hybrid renewable energy plant iti Dungon-Dugon estate iti ili ti Bangui ken Burgos.
Inrepresentar ti gobierno probinsyal ti Ilocos Norte da Governor Cecilia Araneta-Marcos ken ni Vice Governor Matthew Marcos-Manotoc, idinto nga inbagian met ti nasao a korporasyon ni Andres Martin Buldu, ti chief Development Officer ti Alba Renewables Philippines Corporation.
Iti interview ken ni Buldu, inbatad na a kalpasan a napirmaan ti lease agreement ket iyuswat dan ti feasibility study, no sadinno a possible a kalpasan ti tallo agingga ti lima a tawen ket marugyanen ti pannakaestablisar ti nasao a proyekto.
Ti hybrid renewable energy plant ket manamnama a makatulong a mangkissay iti carbon footprint manipud iti gagangay a produksion ti enerhia bayat a mangpataud iti ad-adu a panggedan para kadagiti lokal nga umili.
Ti Alba Renewables ket manamnama nga agpuunan ti agarp 100 a milyon a dolyar para iti nasao a proyekto.
Malaksid iti buwis, manamnama a makakolektar ti gobierno probinsial iti tinawen nga 6-milyon a pisos a lease payment manipud iti developer.
Mainaig iti daytoy, inpeksa ni Vice Governor Manotoc ti naan-anay a suporta ti gobierno probinsial iti nasao a proyekto.
Iti biang met ni Governor Marcos, nagyaman ken ni Manotoc iti panangidasar na iti pundasion ti proyekto idi isu pay laeng ti gobernador ditoy probinsia.
