LAOAG CITY – Inpakaammo ni Engr. Rommel Batuac, ti Chief Operations ti National Irrigation Administration a bimmaba ti lebel ti danum iti Bislak River gapu iti El Nino phenomenon.
Segun kenkuana, ita laeng a mapasaranda ti panagkurkurang ti danum no idasig kadagiti naglabas a tawen isu a masapol ti madagdagus a tignay a maaramid tapno saanen a kumaro pay ti situasion.
Gapu iti daytoy, kunana a naapektaran dagiti sumagmamano a kataltalonan iti downstream iti ili ti Bacarra.
Inlawlawagna nga addan ti 30 a porsiento ti nagbabaan ti lebel ti danum iti Bislak River banag a kasapulanda a lappedan daytoy tapno saan a maminpinsan a madadael dagiti mula dagiti mannalon iti kataltalonan.
Inpalgakna nga iti dadduma a paset ti probinsia kas iti Madongan Dam ket bimmaba met iti lebel ti danumna ngem saan a naapektaran dagiti mannalon iti maseknan a lugar.
Inbatadna a masapol ti panagtitimpuyog dagiti nagduduma a zanjera wenno asosasion dagiti mannalon tapno masupusupan latta ti panagpadanum dagiti kataltalonan.
Kabayatanna, kiniddaw ni Engr. Batuac a no mabalin ket saan pay laeng a mangrugrugi ti 3rd crop iti panagmula dagiti mannalon tapno saan a marigatan dagiti agdama nga agmulmula para iti 2nd crop ti panagpadanum.
