LAOAG CITY – Nagpanawagan ni Dr. Rufino Cravalhu, ti Municipal Veterinary officer iti ili ti Bacarra kadagiti umili a masapul nga adda ti maipakita a Barangay Certificate ken sertipikasyon manipod iti Department of Agriculture dagiti maiserrek a baboy ti nadakamat nga ili.
Segun kenkuana, no adda dagiti partidor nga agiserrek ti baboy nga aggapu iti sabali nga ili ket saan da nga ipalabus nu awan dagiti nadakamat a sertipikasyon a maipakita da gapu ta isu ti napagtutulagan dagiti opisyal ti lokal a gobyerno iti ili ti Bacarra.
Immapela met ni Cravalhu kadagiti umili a no adda dagiti taraken a baboy a makita da nga illegal ti pannakaiserrek na iti ili da ket alaan da ti ladawan wenno video ken ireport da a dagus iti opisina da.
Immuna iti daytoy, temporaryo paylaeng nga innikat da ti restriction ti pannakaiserrek dagiti taraken a baboy a ti kaadwam a maiserserrek a baboy iti ili ti Bacarra ket aggapu iti ili ti Pasuquin.
Kabayatan na, inbatad ni Cravalhu a naiget ti panangmonitor da iti madalanan ti danom manipod iti kanal nga aggapu iti barangay a nagpositibo iti African Swine Fever (ASF) virus iti ili ti Vintar.
Innayon na a binalakadan da metten dagiti backyard raiser iti paset ti Barangay Buyon iti ili ti Bacarra a liklikan da paylaeng ti agusar iti danom manipod iti kanal a pagpadigos wenno pagpainom kadagiti taraken da a baboy.
Maipalagip a nasurok a 300 a baboy ti napapatay gapu ti African Swine Fever virus iti Barangay Alejo Malasig iti ili Vintar.
