LAOAG CITY – Nangbukel ti lokal a gobierno ti ciudad ti Batac ti uppat a grupo tapnu mangisayangkat ti inspeksyon kadagiti nagduduma a pasdek kalpasan ti idadayyeg ti magnitude 5.8 a gingined ditoy probinsya a nagsentro iti ili ti Pasuquin.
Segun kenni Mayor Markee Chua, kalikagom na a makita a nasayaat dagiti establishimento no natalged met laeng a pagtalinaedan dagiti tattao kalpasan ti insidente.
Karaman kadagiti kangrunaan a mainspeksyon ket dagiti school buildings, merkado publiko, city hall ken dadduma pay.
Immunan a nagpalagip ti Provincial Disaster Risk Reduction Management Office kadagiti umili nga agan-annad ken laglagipen ti “duck, cover, and hold” no adda ti mapasaran a gingined.
