LAOAG CITY – Agtultuloy ti naiget panagsagsagana ti City Government para iti pannakaiwayat ti ASEAN Summit ditoy ciudad ti Laoag ita a tawen.
Inbatad ni Mayor James Bryan Alcid nga awan pay ti pinal a naipakaammo iti gobierno lokal ditoy ciudad ti Laoag no ania aldaw ken dagiti lugar a pakaiwayatan ti summit.
Nupay kasta, inpasingked ti mayor nga agtultuloy ti ar-aramiden da a panagsagana para iti naindaklan nga aktibidad ditoy ciudad ti Laoag.
Immunan nga inrakurak ni Mayor Alcid nga adda dagiti ambassadors a nagturong ditoy ciudad iti kallabes tapno tingitingen ti lugar ken siguradwen a natalged para kadagiti ASEAN leaders.
Innayon na a karaman kadagiti binisita dagiti ambassadors ket dagiti ospital tapno masigurado nga adda dagiti nakasagana a mangipaay ti serbisyo medikal no adda ti mapasamak nga emergency kabayatan ti ASEAN Summit ditoy ciudad ti Laoag.
Ti ASEAN Summit ket mabigbig kas napateg a panagtataripnong dagiti Southeast Asian countries tapno mapagsasaritaan dagiti napateg a regional ken global issues.
