LAOAG CITY – Nagbalinen a 1st Class Municipality iti lokal a gobierno ti Pinili manipud iti 3rd Class Municipality.
Daytoy ket maibasar iti Department of Finance Order No. 074-2024 a pimmasa ti nadakamat a munisipyo iti average annual regular income-na.
Inlawlawag ti lokal a gobierno iti nasao nga ili a manipud iti annual regular income-da a P130-M wenno nababbaba iti P160-M ket nagbalin daytoyen a P200-M annual regular income rason a nagbalin daytoy a 1st Class.
Segun iti municipal government, daytoy ti pakakitaan iti agtuntunos a panagkaykaysa ken nasayaat a pannagtrabo dagiti empleado iti nasao nga ili.
Kinunada no awan ti naiget ken nasayaat a panagtrabaho ken ti panangipaay ti napintas a serbio kadagiti umili ket saan da a magun-od daytoy a banag.
Pinasingkedanda nga agtul-tuloy ti panagtitinnulong dagiti amin nga opisyales ken empleado ti lokal a gobierno ti Pinili tapno ad-adda pay a mapadur-as ti nasao nga ili.
Kabayatanna, karaman a pimmasa dagiti dadduma pay a nga ili kas iti ili ti Pasuquin, Badoc, Dingras, Nueva Era, Banna, Pagudpud, Piddig, San Nicolas ken Vintar.
