LAOAG CITY – Nakasaganan a rugian ti lokal a gobieno iti ili ti Solsona ti pannakaipasdek ti Watch Tower kadagiti kabanbantayan tapno maliklikan ti grass wenno forest fire ken maammoan ti namunganayan ti uram.
Segun ken ni Mayor Joseph De Lara iti nasao nga ili nga iyur-urayda laengen ti addang nga aramiden ti Department of Environment and Natural Resources Office agsipod ta saanda a kabaelan no isuda laeng.
Inadmitirna a narigat a bantayan amin iti sibubukel a kabanbantayan nangruna ket adda dagiti narigat a kasarita ken makaawat a tattao kadagiti pakdaar a maipatpatungpal.
Inbatadna a masapol a masimpa a naimbag dagiti amin a plano sakbay a maipakat ti nasao a proyekto tapno awan met laeng ti mababalaw iti kamaudiananna.
Maipalagip a napanunutan dagiti otoridad ti pannakaipatakder ti Watch Tower tapno malapdan dagiti mapaspasamak nga uram ditoy probinsia.
