LAOAG CITY – Pinaigetan ti lokal a gobierno iti ili ti Solsona ti curfew hours kadagiti agtutubo.
Daytoy ket kalpasan a naipasa ti Municipal Ordinance No. 2021-468, maysa a resolusyon a mangpaiget iti curfew hours kadagiti agtutubo iti nasao nga ili a mangrugi iti alas diyes ti rabii agingga alas kuatro ti parbangon.
Segun ken ni Sang. Bayan Member Marvin Pascua, no man pay adda ti dati nga ordinansa ket kayatda a paigetan pay gapu ta naruay dagiti pakairamramanan dagiti agtutubo nga insidente.
Sumagmamano kadagitoy ket ti panagtakaw da ti gasolina kadagiti naka-parking a lugan iti oras ti rabii, ken dadduma pay a nalalag-an a krimen.
Kuna ni Sang. Bayan Member Pascua, a no man pay nalalag-an laeng dagitoy a krimen ket saan a rumbeng nga i-tolerate, isu kiniddawda iti biang ti Philippine National Police iti ili ti Solsona ken dagiti barangay officials a paigetanda ti panagmonitor.
Malaksid kadagiti krimen, ket mailiklik pay dagiti agtutubo iti desgrasya, gapu ta naruay pay dagiti agmanmaneho a menor-de-edad nga awanan ti lisensya.
Inpakaamo ni Pascua a no agsalungasing iti nasao nga ordinansa ket dagiti nagannak-da wenno dagiti guardian-da ti agsungbat, no sadinno a mapatawanda iti pannusa.
Mainaig iti daytoy ket kiniddaw na kadagiti nagannak a saanda a baybay-an dagiti annak da.
