LAOAG CITY – Inrakurak ni Palace Press Officer, USEc Atty. Claire Castro a pinalubusan na ti Department of Agriculture ken Food Terminal Incorporated (FTI) a mabalin nga utangen paylaeng dagiti local government units (LGUs) ti bagas ti National Food Authority (NFA).
Segun ken ni Castro, maipaayan dagiti lokal a gobierno ti maysa a bolan wenno 30 nga aldaw tapno mangala da ti bagas ken bayadan da laengen daytoy kalpasan a mailako da.
Kuna na a dakkel a tulong ti nasao nga addang kangrunaan na dagiti lokal a gobierno nga awan ti pondo na wenno kwarta a paggatang da ti NFA rice.
Mamati met ni Agriculture Secretary Francisco Tiu Laurel a ti nasao nga addang ket maysa a wagas tapno al-alisto ti maiparuk-at ti NFA rice.
Nupay kasta, kuna ni Castro a saan pay a nadakamat ti Department of Agriculture no kasanu ti kaado ti bagas a mabalin nga utangen ti maysa a lokal a gobierno ken ano ania ti agbalin a sistema no makaala da ngem kalpasan ti maysa a bolan ket saan da pay a nailako amin ti bagas.
Immunan nga inrakurak ni National Food Authority administrator Larry Lacson a nupay adda ti 70 a lokal a gobierno a nangirakurak nga interesado da a mangala ti NFA rice, naginad ti pannakaiparuk-at ti suplay gapu iti nabayag a proseso ti ado a lokal a gobierno idinto a dagiti dadduma ket awan ti pondo na.
