LAOAG CITY – Naan-anayen a nagbalin a linteg ti gakat a gagem a mapagbalin a libre ti College Entrance Examination kadagiti pribado nga higher education institutions (HEIs) para kadagiti kualipikado nga estudiante kalpasan a nag-“lapse into law,” basar iti Malacañang.
Kalikagum ti Republic Act No. 12006 a maawagan pay kas ‘Free College Entrance Examination Act’ nga ipatungpal ti tertiary education kadagiti nakukurapay ngem nasisirib nga agad-adal no sadino saanda a singiren isuda para iti entrance examination fees ken charges para iti college admission.
Iti babaen ti baro a linteg, dagiti amin a private higher education institutions ket nabilin a saan nga agsingir iti nasao a fees ken charges nga ipatpatungpal kadagiti graduates ken graduating student nga agap-aplikar para iti college admission.
Ti linteg ket para kadagiti natural-born Filipino citizen ken manipud iti top 10% ti graduating class. Nasken a manipud dagitoy iti pamilia nga awan ti kabaelanda nga isakad dagiti annakda kadagiti kangrunaan a magastos iti kasapulanda.
Mabalin nga agaplikar dagiti kualipikado nga estudiante iti aniaman a pribado a pagadalan iti pagilian ken kasapulan a makumpleto ti requirements.
Inbilin ti Commission on Higher Education (CHED) a dusaen dagiti pribado a pagadalan nga agsalungasing iti baro a linteg.
Maipalawlawag iti Commission on Higher Education ti Implementing Rules and Regulations (IRR) iti uneg ti 60 nga aldaw manipud nagbalin nga epektibo ti linteg. Naibilin pay ti Commission on Higher Education a makikoordinar iti Department of Education.
Naimandar ti Commission on Higher Education iti Coordinating Council of Private Educational Associations of the Philippines ken dadduma pay a kapada nga institusion.
Iti babaen ti Konstitusion, addaan ti 30 nga aldaw ti Presidente ti pagilian a pirmaan ti linteg wenno i-veto.
Kabayatanna, agbalin a linteg daytoy no saan nga agtignay ti Presidente ti pagilian iti uneg ti 30 nga aldaw.
