LAOAG CITY – Naarestar dagiti otoridad ti United States ti maysa kadagiti lider ti kadakkelan a drug cartel iti lubong a ni Ismael “El Mayo” Zambada.
Ni Zambada ket naarestar dagiti United States federal agent idiay El Paso, Texas.
Ti agtawen 76 a ni Zambada ti nangipasdek iti criminal organization a kaduana ni Joaquin “El Chapo” Guzman nga agdama a nakabalud iti United States.
Idi Pebrero, ni Zambada ket pinilaan ti kaso ti United States iti conspiracy to make and distribute fentanyl, maysa nga agas a napigpigsa ngem ti heroin ken mapabpabasol iti krisis ti opioid idiay Estados Unidos.
