LAOAG CITY – Kinumpirmaran ni PMaj. Rommel Ramos, Deputy Chief of Police ti PNP Laoag a lima a lallaki ti natiliw gapu iti illegal a panagsugal iti maysa a minatayan iti Brgy. 61-Cataban ditoy siudad.
Segun ken ni Ramos, dagiti natiliw ket pakairamanan dagiti mannalon ken welder nu sadino a tallo ti residente iti nasao a barangay idinto a maysa iti Brgy. 60-B Madiladig ken Brgy. 60-A Caaocan ditoy siudad.
Kuna na a naaktwan dagiti otoridad nga agay-ayam ti lucky 9 dagiti maseknan.
Inbatad na nga agdagup ti 2,237 pisos a bet money ti nakumpiskar malaksid iti bukod da a kwarta.
Mainaig iti daytoy, inpakaamo ni Ramos a malaksid iti panagsalungasing iti PD 1602 wenno Illegal Gambling Law ket maipila pay ti Article 148 wenno Direct Assault kontra iti maysa a suspek gapu iti panagkedked na a matiliw ken limmaban kadagiti pulis.
Iti agdama ket nagtalinaed iti kustodyar PNP Laoag dagiti suspek.
