LAOAG CITY – Inpasigurado ni Ms. Joan Nacnac, aglaklako ti bagas iti Laoag City Public Market and Commercial Complex a suportaran da ti Executive Order 39 ni Pres. Bongbong Marcos seknan iti price cap ti bagas nga epektibo ita nga aldaw.
Segun kenni Nacnac, agsakripisyo da para kadagiti aggatang ti bagas ken iti gobierno.
Inlawlawag iti laksid a dakkel ti epekto na daytoy kadakuada nga aglaklako gapo ta malugi da ket awan ti mabalin da no diket ti sumurot ken mangsuporta iti addang ti gobierno.
Kunana nga idi kalman ket nagtataripnong da nga aglaklako ti bagas iti merkado publiko ditoy ciudad ken napagnunumoan da a suruten daytoy isut gapo na nga agpapada da amin ti presyo iti agdama.
Inpalgak na a ikonkonsiderar da met no kasano da a matulungan dagiti consumers isut gapo na nga inaramid da daytoy nga addang.
Mainaig iti daytoy, inbatad na a lima a pisos ti pukaw da iti well-milled rice gapo ta gatangen da daytoy iti 50 pesos ken ilako da iti 45 pesos ken dagiti ang-angkaten da ket aggapo laeng ditoy Ilocos Norte.
Naamoan a kalpasan ti iduduprak ti Bagyo Egay ket ngimmato iti agarop 30 agingga iti 50 a pisos ti nagngatoan ti kada sako ti bagas.
Kabayatanna, mangnamnama ni Nacnac a matulungan ti gobierno isuda nga aglaklako ti bagas.
