LAOAG CITY – Kinumpirmaran ni Barangay Chairman Wenseslao Valdez iti Barangay 9, San Lorenzo iti ili ti Sarrat nga agkakapamilya dagiti innem a baro a kaso ti covid-19 iti barangay da.
Segun kenni Valdez, ni IN-C38, IN-C39, IN-C40, IN-C41, ken IN-C42 ket agkakabbalay ken kumpirmado a nakapulapol na ni IN-C36 idinto a ni IN-C43 ket naikamang iti nasao a pamilya ken adda ti bukod na a pagtaengan.
Inbatad na a gapo iti daytoy ket naisubli manen dagiti barikada kadagiti nakaipatungpalan ti lockdown iti Sitio 1, 2, 3, 4 ken 5, nga ummunan nga inikkat da.
Kunana a gapo iti naggigiddan a panagpositibo dagiti kabarangayan na ket ado dagiti maaw-awat da a diskriminasyon ngem saan da nga ipappapuso daytoy tapno saan da unay a maapektaran.
Maipalagip a ni IN-C37 ket naakaran pay ni IN-C36 itay laeng kallabes.
Kabayatanna,
Inlawlawag ni Mayor Remigio Medrano a nadeterminaran dan dagiti kangrunaan a nakapulapol dagiti innem a baro a kaso ti covid-19 iti Barangay 9, San Lorenzo iti ili ti Sarrat, ken naka-quarantine iti agdama dagitoy.
Segun kenni Medrano, ita nga aldaw ket dimmalan da iti swab test tapno maamoan no positibo wenno negatibo iti virus dagiti agarop 50 nga indibidwal.
Inbatad na nga agtultuloy latta met ti contact tracing para kadagiti secondary contacts dagiti nagpositibo a kaso.
Kunana nga idi nagpositibo ni IN-C36 ken IN-C37 ket awan met unay ti inrakurak na nga aktibidades da isut gapo na a nasdaaw da idi rimwar a positibo dagiti innem a taga Barangay 9.
Gapo iti daytoy, nagpanawagan ni Medrano nga ipudno kuma dagiti tattao a makumpirmaran a positibo tapno al-alisto ti pananglapped iti panagwaras ken pananglaban iti virus.
Kunana a saan met a maikonsiderar a local transmission daytoy gapo ta dagiti baro a nagpositibo ket maysmaysa a pamilya.
Mainaig ti daytoy, kuna ti mayor a saan a nalaka ti contact tracing kadagiti nakapulapol ni IN-C39 ngem naiget ti panagtrabaho da partikular ti contact tracing team tapno madeterminar dagitoy.
Daytoy ti rason a saan pay laeng a naglukat ti Sta. Rosa Public Market, pakairamanan ti slaughter house ti nasao nga ili.
Iti agdama ket nakalockdown iti Sitio 1, 2, 3, 4, ken 5 iti Barangay 9, pakairamanan ti Sitio 7 iti Barangay 8, San Antonio iti nasao nga ili.
Saan met pay a masigurado ti Mayor no kasano ti kapaot ti maipatpatungpal a lockdown kadagiti nadakamat a Sitio ngem agbasar da kadagiti rumwar nga impormasyon.
