LAOAG CITY – Nagtalinaed iti kustudiyar ti PNP-Laoag dagiti lima a lallaki kalpasan a naaktuan a nagsusugal iti maysa a minatayan idiay Barangay 47, Bengcag ditoy ciudad ti Laoag.
Nabigbig dagitoy a da Timjay Cadiz Juan, agtawen ti 23; Reynaldo Davinci Basilio, agtawen ti 45; Ruben Laurico, agtawen ti 32, agpapada a residente iti nasao a barangay.
Malaksid kadagitoy, naipisok pay iti pagbalodan da Glenn Bark Cariño, agtawen ti 36, taga Bantay, Ilocos Sur ken ni Victor Dolorio Aquino Madamba Jr., agtawen ti 49 a residente ti Barangay Tangid iti nasao a ciudad.
Naamoan a dagiti natiliw ket agsusugal da ti Lucky 9 iti minatay ti agnagan ti Bella Tolentino Alcaraz.
Nakumpiskar dagiti otoridad 5, 650 a pisos, tugtugaw, lamisaan ken maysa a set ti baraha.
Iti agdama ket maisagsaganan ti kaso kontra kadagiti nasao a lallaki mainaig ti illigal a panagsusugal.
