LAOAG CITY – Naarestar dagiti lima nga indibidual gapu iti panagsugalda ti Lucky 9 iti maysa a minatayan iti Brgy. 6 ditoy siudad ti Laoag.
Natiliw dagitoy babaen iti naiwayat nga Anti-Illegal Gambling Operation.
Basar iti Laoag City Police Station, dagiti suspek ket agtawen iti 42, awanan asawa, agtawen iti 31, awanan asawa, agtawen iti 54, balo ken dagiti dua pay nga adda iti umno a tawen nga agpapa amin dagitoy a residente ti Brgy. 6 ditoy siudad ti Laoag.
Malaksid kadakuada, adda pay ti sangapulo nga indibidual ti nakalibas.
Gapu iti daytoy, nakumpiskar dagiti otoridad ti 40 a pedaso ti playing cards, 7,920 a pisos a mapapati a nagbalin a pusta ken dadduma pay a gambling paraphernalia.
Kabayatanna, manamnama a sumango ti kaso dagiti nadakamat a suspek gapu iti panaglabsingda iti Presidential Decree 1602 wenno ti Illegal Gambling Law.
