LAOAG CITY – Inlungalong ni Bicol Saro party-list Rep. Brian Raymund Yamsuan ti House Bill 10734 tapno agbalin a “future-proof” dagiti learning materials ken masigurado ti umdas a bilang dagiti libro kadagiti publiko a pagadalan.
Segun ken ni Yamsuan, magun-od laeng ti gagem ti House Bill 10734 no mapatibker ti relasyon ti Department of Education ken ti National Book Development Board.
Inaramid ti mammanday-linteg ti addang kalpasan a naduktalan ti Second Congressional Commission on Education (EDCOM II) ti panagsagaba dagiti estudyante kadagiti public schools gapu iti kinakurang dagiti libro.
Impaganetget ni Yamsuan a ti bill ket mangsungbat pay kadagiti nabayagen a parikut dagiti estudyante, partikular iti kabaelanda iti mathematics, science ken reading.
Ti dakdakamaten pay ti mammanday-linteg ket ti resulta ti Program for International Students Assessment (PISA) study idi 2022 a mangipakpakita a mabaybay-an dagiti estudyante a Pilipino no maipapan kadagiti nadakamat nga asignatura.
Panggep pay ti House Bill ti mangbukel iti Textbook Review Committee a mangimaton iti pannakarepaso dagiti libro ken teacher’s manual kadagiti publiko a pagadalan.
