LAOAG CITY – Ballaigi iti pannakaisayangkat ti Little League Philippines Series 2024 ditoy Ilocos Norte.
Daytoy ti inpakaammo ni Mrs. Helen Rose Domingo iti mangidadaulo iti Provincial Sports and Development Office.
Kunana nga awan dagiti naipadanon kadakuada a nagbalin a reklamo dagiti bisita ken dagiti nakipaset iti nasao nga aktibidad.
Inbatadna nga uray nagbalin a limitado iti aldaw a panagsaganada iti nasao nga aktibidad ket napintas latta ti nagbalinan a resulta daytoy.
Inlawlawagna a maysa kadagiti nagustoan dagiti nakipaset ket ti saanda a panagbiahe nga agturong iti pagay-ayamanda manipod iti dormitorio a nagtarusanda.
Kunana kas resulta iti nasao nga aktibidad ket nakagun-od iti grupo ti Ilocos Norte iti tallo a kampeonato; dua ti softball ken maysa iti baseball.
Innayonna a nakagun-od pay ti team Ilocos Norte ti dua a silver ken maysa a bronze medal.
Kabayatanna, naammoan nga adda ti 5 teams nga agturong idiay Tanawan, Batangas inton sumaruno a bulan para iti national level.
